HStAOrient5a: 39v

qavlince baʿde ḫarābi l‑beden fenāsı lāzım gelür. Ve bu meẕheb meẕheb‑i // merdūddur. Egerçi qudemādan Eflāṭūn ve ġayrisi qıdem‑i nefse ẕāhib // olmışdur. Ammā Arisṭo ve müteʾeḫḫirīnden Ebū ʿAlī ve ġayrisi // ḥudūs̱ına qāʾil olmışdur. Zīrā buṭlān‑i tenāsüḫde ʿumde‑i vüs̱qā // ḥudūs̱‑i nefsdür. Baʿdehū nefs‑i nāṭıqanuñ bedene taʿalluqında ḥikmet‑i // bāʿis̱e taḥṣīl‑i meṭālib‑i fāʾiqa ve tekmīl‑i kemālāt‑i lāyıqadur. Ṭāqat‑i // beşerīye miqdārınca[dur]. Lākin nüfūs bir ḫuṣūṣda merātib‑i muḫtelife üzerinedür. // Mertebe‑i ūlā: mertebe‑i ʿurefāʾ‑i fāʾizīn ve suʿadāʾ‑i vāṣılīndür ki nüfūs‑i // beşerīye mümkin olan maʿārif anlara ḥāṣıl olmışdur tāreten quvvet‑i // naẓarīye ve tāreten quvvet‑i ʿamelīyesi ile. Qaçan‑ki şevāġil‑i bedenīyeden // müstaḫlaṣ ve küdūret‑i heyūlādan muṣaffā ve muqaddes olalar // derecāt‑i seʿādete irtiqā ve leẕẕāt‑i ʿulyāya ittiṣāl ü intimā ėderler. Mertebe‑i // s̱ānīye: ol ṭāʾife mertebesidür ki anlara cemīʿ‑i meṭālib‑i mümkine müyesser olmışdur. // Ve bu ṭāʾife üç qısımdur. Bir qısmı şol nüfūs‑i ṣāliḥadur ki anlaruñ // mirʾāt-i istiʿdādlarında baʿżı ṣuver‑i meṭālib‑i ʿalīye cilve‑ger olmışdur. // Ammā ażdād‑i meṭāḷibüñ kesbine aṣlen istiʿdādları yoqdur. Ol nüfūsa // nüfūs‑i bülh dėrler Wa‑hum fī saʿatin min raḥmati llāhi taʿālā. Anlar daḫı quyūd‑i beden // ile muqayyed olmayıcaq seʿādet‑i lāyıqaları ile müstesʿid olurlar. Resūlullāh ʿa[leyhi s‑selā]m // ḥadīs̱‑i şerīfinde Akṯaru ahli l‑ǧannati l‑bulh dėdügi bunlardur dėmişler.